NIMERIDHISHWA NA MAENDELEO MRADI WA SHULE YA SEKONDARI KIBUMAYE "Mkuu wa Mkoa wa Mara"

Posted on: December 30th, 2025

Mkuu wa Mkoa wa Mara Mh.Kanali Evans Alfred Mtambi ameonesha kuridhishwa kwake na hatua iliyofikiwa katika ujenzi wa shule ya sekondari Kibumaye iliyopo kata ya Ketare akisema mradi huo utaongeza fursa za elimu kwa vijana na kuboresha mazingira ya kujifunzia.

Amezungumza hayo katika ziara yake Disemba 29, 2025 Halmashauri ya Mji Tarime. Mkuu wa Mkoa amesifu kasi na ubora wa kazi inayotekelezwa, akibainisha kuwa majengo mengi yamekamilika kwa viwango vinavyokubalika pia amesisitiza umuhimu wa kuzingatia ratiba ili shule ianze kutumika kwa wakati uliopangwa.

“Nimeridhishwa na maendeleo ya ujenzi wa shule hii ya sekondari kazi inaonekana kufanyika kwa ubora unaokubalika, mradi huu ni kielelezo cha dhamira ya Serikali inayoongozwa na Mh. Raisi Dkt.Samia Suluhu Hassan katika kuboresha sekta ya elimu na kuhakikisha watoto wetu wanasoma katika mazingira bora.” Amesema  RC Mtambi

Aidha, amewahimiza wakandarasi na wasimamizi wa miradi kuendelea kudumisha ubora, uwajibikaji na matumizi sahihi ya rasilimali za umma na kutoa wito kwa wananchi kushirikiana na kutoa ulinzi wa miundombinu hiyo ili idumu kwa muda mrefu.

Kwa upande wao, viongozi wa eneo hilo wameeleza kuwa ujenzi wa shule hiyo utapunguza msongamano wa wanafunzi katika shule zilizopo na kuongeza ufaulu kutokana na mazingira bora ya kujifunzia. Wananchi nao wameishukuru Serikali kwa kuwekeza katika elimu na kuahidi kushiriki katika kuilinda na kuitunza shule hiyo.

Mradi huo umegharimu Jumla ya kiasi cha shilingi 584,280,029/=