TARIME MJI YAENDESHA ZOEZI LA UHAKIKI, USAJILI NA UGAWAJI WA VITAMBULISHO VYA BIMA YA AFYA KWA WOTE KWA TASAF AWAMU YA KWANZA.

Posted on: February 14th, 2026

Halmashauri ya Mji Tarime kwa kushirikiana na Mfuko wa Taifa wa Bima ya Afya imeendesha zoezi la uhakiki, usajili na kugawa vitambulisho vya Bima ya Afya kwa wote baada ya kuwapiga picha na kuchukua alama za vidole kutoka kwa watu wa kaya zisizo kuwa na uwezo zilizopo kwenye mpango wa TASAF awamu ya kwanza.

Zoezi hilo limefanyika katika vituo vilivyotengwa kwa ajili ya uhakiki ambavyo ni kituo cha ujenzi kilichopo kata ya Bomani, kituo cha Nkende kilichopo kata ya Nkende, Kituo cha ketare kilichopo kata ya ketare pamoja na kituo cha Kenyamanyori kilichopo kata ya Kenyamanyori.

Akizunguma kuhusu zoezi hilo Mratibu wa Bima ya Afya Halmashauri ya Mji Tarime ndugu Masatu Salige Sospeter amewasihi viongozi wa Mitaa kuendelea kushiriki katika zoezi hili kikamilifu ili kuhakikisha walengwa wote wanafikiwa kwa wakati.

"Serikali kupitia Mamlaka ya Usimamizi wa Bima ya Afya imeweka utaratibu maalum wa kutambua na kusajili kaya zisizo kuwa na uwezo zilizopo kwenye mpango wa TASAF ili ziweze kupatiwa vitambulisho vya Bima ya Afya kwa Wote bila kikwazo cha kifedha hivyo tunawasihi viongozi wa Mitaa kuendelea kushirikiana nasi kuhakikisha walengwa wote wanafikiwa kwa wakati.” Amesema Sospeter.

Kwa upande wao wananchi waliojitokeza katika zoezi hilo wamemshukuru Raisi wa Jamhuri ya Muungano wa Tanzania Dkt.Samia Suluhu Hassan kwa mpango wa Bima ya Afya kwa Wote kwani wanauhakika wa kupata huduma za Afya bila hofu ya kushindwa kulipia gharama za Matibabu.

Zoezi hilo ni sehemu ya jitihada za Serikali kuhakikisha kila mwananchi anakuwa na kinga ya kifedha dhidi ya gharama za matibabu na kupata huduma bora za afya bila vikwazo pia ni moja ya ahadi za siku 100 za Mhe Rais wa Jamhuri ya Muungano wa Tanzania.