DC GOWELE AWATAKA WAENDESHA PIKIPIKI KUDUMISHA AMANI SIKU YA UCHAGUZI

Posted on: October 27th, 2025

Mkuu wa Wilaya ya Tarime Mhe. Meja Edward Gowele leo amewataka maafisa usafirishaji katika Halmashauri hiyo kuwa mabalozi wa amani na kuepuka kutumika kwa maslahi binafsi kwa ajili ya kuvuruga utulivu wa nchi kuelekea uchaguzi Mkuu October, 29.

Akizungumza katika mkutano maalum uliofanyika katika ukumbi wa CMG, Mkuu huyo wa Wilaya amesema sekta ya usafirishaji ni muhimu katika uchumi na usafirishaji wa wananchi, hivyo ni vyema wakatambua nafasi yao katika kulinda amani na usalama wa taifa.

“Nawaomba msikubali kutumiwa vibaya na mtu yeyote kwa maslahi binafsi. Kazi yenu ni halali na muhimu. Tuwe makini, tuwe raia wema, na tuchague viongozi kwa amani,” amesema Gowele 

Aidha, amewaahidi maafisa usafirishaji hao kuwapatia pikipiki moja kwa ajili ya Ofisi ya umoja wao wa Maafisa usafirishaji, pia amewataka kuendelea kushirikiana na vyombo vya usalama kwa ajili ya kulinda amani na utulivu kuelekea uchaguzi Mkuu October 29.

Kwa upande wao viongozi wa umoja wa maafisa usafirishaji maarufu "Bodaboda" katika wilaya hiyo wameshukuru serikali kwa kuwatambua na kuendelea kushirikiana nao, wakiahidi kuunga mkono jitihada za kudumisha amani wakati wote wa kipindi cha uchaguzi.

Mkutano huo ulihudhuriwa na maafisa wa usalama, wadau wa maendeleo, na baadhi ya wawakilishi wa vyama vya siasa