ZAHANATI YA RONSOTI YAANZA KUTOA HUDUMA RASMI

Posted on: November 22nd, 2024

Kaimu Mganga Mkuu wa Halmashauri ya Mji Tarime Dkt. Joshua Makoa anawakaribisha wananchi wote kuja kupata matibabu kwenye zahanati ya Ronsoti iliyopo kata ya Nyamisangura ambayo imeanza rasmi kutoa huduma

Zahanati ya Ronsoti iliyopo kata ya Nyamisangura Halmashauri ya Mji Tarime imeanza kutoa huduma za afya rasmi huku wananchi wa Kata hiyo wakijitokeza kwa wingi kuja kupata matibabu

Akizungumza na waandishi wa habari katika zahanati hiyo Kaimu Mganga mkuu wa Halmashauri ya Mji Tarime Dkt. Joshua Makoa amewaomba wananchi kuendelea kujitokeza kwani zahanati hiyo tayari ina kila kitu cha kutoa huduma za afya

“Tunamshukuru Rais wa Jamhuri ya Muungano wa Tanzania Mhe. Samia Suluhu Hassan kwakuendelea kutekeleza miradi ya afya katika Halmashauri yetu hivyo wananchi mnakaribishwa sasa kuja kupata huduma katika zahanati hii kwani imekamilika kwa kila kitu” amesema Makoa

Kwa uapnde wao wananchi wa Kata hiyo wameishukuru Serikali kwakuwasogezea huduma karibu na makazi yao kwani hapo awali walikuwa wanapata changamoto

“Binafsi nasema asante kwa huduma kuwa karibu sasa hata watoto wakiugua itakuwa raisi sasa kuja kuhudumia asante Serikali kwakuendelea kutujali” amesema Rhobi Juma

Zahanati ya Ronsoti imejengwa kwa mapato ya ndani ya Halmashauri hadi kukamilika imetumia jumla ya Tsh 108,000,000/=