WANANCHI WAHIMIZWA KUSHIRIKI UCHAGUZI WA SERIKALI ZA MITAA 2024 TARIME MJI

Posted on: September 26th, 2024

Msimamizi wa Uchaguzi wa Serikali za Mitaa katika Halmashauri ya Mji Tarime Bi Gimbana E Ntavyo amewaomba viongozi mbalimbali na asasi za kiraia kuwahimiza wananchi kushiriki katika uchaguzi wa Serikali za mitaa kwakugombea nafasi mbalimba, kujitokeza kujiandikisha na kuwapigia kura viongozi bora

Hayo ameyasema leo kwenye ukumbi wa wa Halmashauri ya Mji wakati akitoa maelekezo ya Uchaguzi wa Serikali za Mitaa wa Mwaka 2024 katika Halmashauri ya Mji huku akisisitiza elimu ya mpiga kura ikitolewa kwa ufasaha wananchi watajitokeza wengi

"Sisi kwa umoja wetu kwenye maeneo yetu tukitoa elimu hii vizuri kwa wananchi naamini kabisa watajitokeza kwa wingi kushiriki uchaguzi wa serikali za mitaa kwani ni haki yao kikatiba kuanzia kugombea nafasi, kujiandikisha kwenye daftari kwa mtaa husika na kupiga kura siku ya tarehe 27, Novemba mwaka huu" amesema Gimbana

Aidha, amewataka viongozi hao pia wawashauri wanawake wenye sifa za kugombea katika jamiii kuja kuchukua fomu ili kuwania nafasi mbalimbali za Serikali za mitaa katika Halmashauri hiyo

"Zoezi la ugawaji fomu ni kuanzia tarehe 1 Novemba 2024 hadi tarehe 7 Novemba 2024 kuanzia saa moja na nusu asubuhi hadi saa kumi kamili jioni Hivyo washaurini wanawake wenye sifa za kugombea kwenda kuchukua fomu pia za kugombea" amesema Gimbana

Uchaguzi wa serikali za mitaa unatarajiwa kufanyika tarehe 27, Novemba 2024, huku zoezi la wananchi kujiandika katika daftari la wapiga kura litaanza tarehe 11 hadi tarehe 20, Octoba 2024 katika mitaa yote 81 kutakuwa na vituo kuanzia majira ya saa 2 kamili asubuhi na kufungwa saa 12 kamili jioni kauli mbiu ni " Serikali za Mitaa, Sauti ya Wananchi, jitokeze kushiriki Uchaguzi"