URAMBO DC YAFANYA ZIARA YA MAFUNZO TARIME MJI

Posted on: September 7th, 2024

Halmashauri ya Wilaya ya Urambo Mkoani Tabora imefanya ziara katika Halmashauri ya Mji Tarime lengo ikiwa ni kujifunza namna ya uanzishilishi na usimamizi wa miradi mbalimbali ya maendeleo pamoja na ukusanyaji wa mapato katika Halmashauri

Akizungumza baada ya mapokezi katika ukumbi wa Halmashauri Mkuu wa Wilaya ya Urambo Mhe. Dkt Khamis Mkanachi amesema lengo la ziara hiyo ni kujifunza mambo mbalimbali ambayo yanatekelezwa katika Halmashauri ya Mji Tarime hususani ukusanyaji wa mapato, na uanzilishwi wa miradi mbalimbali ya kuongeza mapato ya Halmashauri 

"Lengo letu ni kujifunza namna ya kuendelea kuongeza mapato ya Halmashauri yetu, nyinyi Tarime Mji mmeweza na ni matumaini yangu pamoja na msafara huu tutajifunza mengi kutoka kwenu ili tukaendelee kuboresha kwenu" amesema Khamis

Kwa Upande wake Mkuu wa Wilaya ya Tarime Mhe. Meja Edward Flowin Gowele amewapongeza kwakuitembelea Tarime kuja kujifunza na amewahakikishia watawapa ushirikiano wa kutosha kwa kila eneo ambalo watataka kujifunza katika Halmashauri ya Mji Tarime

"Hongereni kwa maamuzi mazuri ya kuja kujifunza kwetu sisi hili ni baraka sana kwetu, Tarime ni salama sana na tutawapa ushirikiano wote ili mfanikishe kile ambacho mlikikusudia kufika katika Halmashauri yetu ya Mji Tarime'' amesema Gowele

Ziara hiyo imefanyika leo Septemba 7, ikiongozwa na Mkuu wa Wilaya ya Urambo Mhe. Dkt Khamis Mkanachi, Katibu Tawala wa Wilaya ya Urambo Ndugu Innocent Nsena, Mwneyekiti wa Halmashauri hiyo Mhe. Adam Malunkwi, Mkurugenzi wa Halmashauri hiyo Ndugu Grace Quintine, Madiwani pamoja na watumishi wa Halmashauri hiyo