RC MTAMBI AWATAKA WANANCHI KUCHANGAMKIA FURSA YA MATIBABU TOKA KWA MADAKTARI BINGWA

Posted on: June 24th, 2024

Mkuu wa Mkoa wa Mara Mhe. Kanali Evans Alfred Mtambi leo amewapokea Madaktari Bingwa 45 waliopo katika Mpango wa Rais Samia watakaofanya kazi katika Hospitali za Halmashauri za Mkoa wa Mara kuanzia tarehe 24-28 Juni, 2024.

Akizungumza katika hafla ya kuwapokea madaktari hao, Mhe. Mtambi amesema Serikali imewaleta madaktari hao ili kuimarisha utoaji wa huduma za afya kwa wananchi wa Mkoa wa Mara kwa kuwaletea huduma za kibingwa katika ngazi ya Halmashauri zao na kuwataka kuchangamkia fursa hiyo.

“Hii itawapunguzia wagonjwa safari za kwenda mbali kutafuta huduma za kibingwa katika Hospitali za rufaa badala yake watazipata huduma za kibingwa karibu na maeneo yao” amesema Mhe. Mtambi.

Mhe. Mtambi amewataka madaktari wa hospitali zitakazofikiwa na wataalamu hao kutumia fursa hiyo kujifunza na kuongeza ujuzi wao katika kuwahudumia wananchi.

Mhe. Mtambi amewataka wadau wote wa sekta ya afya kuunganisha nguvu na kuhakikisha kampeni hiyo katika Mkoa wa Mara inafanyika kwa ufanisi wa hali ya juu na mikoa mingine ije Mkoa wa Mara kujifunza utekelezaji wa kampeni hiyo.

Mhe. Mtambi amezitaja huduma zitakazotolewa na madaktari hao ni pamoja na huduma za afya kwa watoto wachanga, huduma za uzazi, wajawazito na magonjwa ya wanawake, huduma ya magonjwa ya ndani, huduma za upasuaji na huduma za ngazi na usingizi.

Kwa upande wake Mkurugenzi wa Halmashauri ya mji Tarime Ndg. Gimbana Ntavyo amesema maandalizi yote muhimu kwaajili huduma hizo katika Hosptali mji Tarime (Bomani) yamekamilika na kuwataka wananchi kujitokeza kwa wingi

"Maandalizi yote yamekamilika niwaombe wananchi waje sasa kwani hawa madaktari hawa Mhe Rais wa Jamhuri ya Muungano wa Tanzani Dkt. Samia amewaleta kwaajili yao" amesena Gimbana