RC MTAMBI AIETEMBELEA HALMASHAURI YA MJI TARIME

Posted on: May 2nd, 2024

Mkuu wa Mkoa wa Mara Mhe. Kanali Evans Alfred Mtambi ameitembelea Halmashauri ya mji Tarime ikiwa ni ziara yake ya kwanza katika Halmashauri hiyo amewataka watumishi wa Halmashauri ya hiyo kuhakikisha wanatoa huduma bora kwa wananchi bila ya uwepo wa ubaguzi wowote kwa kila idara katika Halmashauri hiyo

Maelekezo hayo ameyatoa leo kwenye ukumbi wa Halmashauri wakati wa kikao kifupi na watumishi hao na kusisitiza watumishi hao watoke maofisi Kwenda kusikiliza na kutatua kero mbalimbali za wananchi

“Nawataka mtoke maofisi, kasikilizeni na kutatua kero za wananchi na toeni huduma bora kwa kila mwananchi bila kumbagua ikiwa ni sambamba na kutumia lugha nzuri pale unapotoa huduma kwa wananchi” amesema Mtambi

Aidha, Mhe Mtambi amewataka Viongozi mbalimbali katika Wilaya hiyo kuhakikisha wanaendelea kutoa elimu kwa jamii ili kutokomeza kabisa vitendo vya kikatili katika Wilaya hiyo

Kwa upande wake, Mwenyekiti wa Halmashauri hiyo Mhe Daniel Komote amemhakikishia Mkuu wa mkoa kuwa Halmashauri ya mji Tarime itatekeleza kwa vitendo maelekezo yote ambayo yametolewa

“Nipende kukuhakikishia Mhe Mkuu wa Mkoa, Halmshauri hii itatekeleza yote ulioelekeza kuanzia sasa na tuko tayari muda wowote kusikiliza maelekezo mengine” amesema Komote

Ziara hiyo ya mkuu wa mkoa katika Halmashauri ya mji Tarime ilihitimishwa na kwakutembelea Soko la kisasa linaloendelea kujengwa Pamoja na mradi wa maji wa Tarime Rorya