MUWASA YAANZA UTEKELEZAJI WA MAELEKEZO YA MKUU WA WILAYA TARIME

Posted on: July 19th, 2024

Mkuu wa Wilaya ya Tarime Mhe. Kanali Maulid Hassan Surumbu ameipongeza Mamlaka ya Majisafi na usafi wa Mazingira Musoma (MUWASA) kanda ya Tarime kwakuanza kufanyia kazi kwa vitendo maelekezo aliyoyatoa kuhusu ujenzi wa chujio la kutibu maji pamoja na uwekaji wa uzio kwenye chanzo cha maji cha Nyandurumo kilichopo kata ya Kenyamanyori Halmashauri ya Mji Tarime

Pongezi hizo amezitoa Julai 18 baada ya kukamilisha ziara yake fupi ya kutembelea miradi ya maji katika Halmashauri ya Mji Tarime na kuwataka kuharakisha ujenzi wa chujio hilo ili likamilike kwa wakati na wananchi waanze kupata huduma ya maji safi na salama

"Nilitoa maelekezo nilivyokuja hapa mwezi wa nne naona mmeanza kuyatekeleza kwa vitendo jambo zuri, mradi huu wa chujio ukikamilika utataua kero ya maji ambayo yamekuwa na yanatoka na tope hivyo waamizeni mafundi wahakikishe wanamaliza kwa muda" amesema Surumbu

Aidha, Mhe. Surumbu amemshukuru Rais wa Jamhuri ya Muungano wa Tanzania Mhe. Dkt Samia Suluhu Hassan kwakutoa fedha kiasi cha Tsh 617,364,926.67 kwaajili ya ujenzi wa Chujio hilo kwani litawasaidia wananchi wa zaidi ya 50000 katika Halmashauri ya Mji Tarime

kwa upande wake Mkurugenzi Mtendaji wa Mamlaka ya Majisafi na Usafi wa Mazingira  Musoma (MUWASA) Mhandisi Nicas Mugisha amesema wataendelea kutekeleza kwa vitendo maelekezo na ushauri alioutoa Mkuu wa Wilaya na atahakikisha mradi unakamilika kwa muda uliopangwa ili uanze kutoa huduma

"Yote tumeaypokea na yataanza kufanyiwa kazi kuanzia sasa hivi, na tutamsimamia vyema fundi ili mradi huu usisimame na ukamilike kwa wakati uliopangwa" amesema Mugisha