MKUU WA WILAYA TARIME ATEMBELEA WANUFAIKA WA TASAF

Posted on: June 10th, 2024

Mkuu wa Wilaya ya Tarime Mhe. Kanali Hassan Maulid Surumbu amewatembelea wanufaika wa mpango wa kunusuru kaya masikini (TASAF) kwenye kaya zao katika Halmashauri ya mji Tarime na kuwapongeza kwakutumia fedha wanazopata kuwekeza katika maendeleo ya familia zao

Pongezi hizo amezitoa wakati alipotembelea kwenye baadhi ya kaya hizo na kumtaka mratibu wa TASAF Halmashauri ya Mji Tarime kuhakikisha anashughulikia changamoto zinazowakabili walengwa ili kumaliza manunguniko kwa walengwa hao

''kiukweli nimefurahishwa sana na maendeleo yenu hii inaonesha ni jinsi gani mmepata elimu ya kutosha juu ya matumizi sahihi ya fedha mnazopata, rai yangu kwa waratibu ni kushughulikia changamoto za hawa walengwa ili tupunguze kabisa manungu'niko kama ambavyo Mhe. Rais ameagiza'' amesema Surumbu

Aidha, Kanali Surumbu amemshukuru Raisi wa Jamhuri ya Muungano wa Tanzania Mhe. Dkt Samia Suluhu Hassan kwakuamua vijiji vyote viingizwe kwenye mpango wa kunusuru kaya masikini kwani imeongeza chachu kubwa kwa maendeleo ya familia hizo

Kwa upande wake Mratibu wa TASAF Halmashauri ya mji Tarime Ndugu Desmund Basaya amemhakikishia mkuu wa wilaya hiyo kushughulikia haraka changamoto zote ambazo zilizosemwa na walengwa