DC GOWELE AFANYA KIKAO NA KAMATI YA ULINZI NA USALAMA NGAZI MTAA TARIME MJI

Posted on: November 21st, 2025

Mkuu wa Wilaya ya Tarime Mhe. Meja Edward Gowele ameongoza kikao maalumu kwa wajumbe wa kamati ya ulinzi na usalama ngazi ya Mtaa Halmashauri ya Mji Tarime kwa lengo la kujadili hali ya usalama na namna ya kuimarisha ulinzi katika jamii. 

Akizungumza katika kikao hicho ambacho kimefanyika Leo katika ukumbi wa Halmashauri ya Mji Tarime Gowele amezitaka kamati hizo kuongeza ushirikiano na kutoa taarifa mapema kuhusu viashiria vya uvunjifu wa amani ili kudhibiti matukio kabla hayajawa makubwa.

“Kamati za ulinzi na usalama ngazi ya Mtaa ni nguzo muhimu katika kufanikisha usalama wa mitaa yetu. Nawasihi muimarishe Kasi ya utoaji taarifa za viashiria vyote vya uvunjifu wa amani na kusimamia uadilifu wenu katika utendaji wa kila siku".Alisema Gowele

Pia ameelekeza Kuwepo kwa orodha ya idadi ya wakazi katika kila mtaa "Kanzi Data" wakiwemo wageni waliopanga na taraarifa za wanapotoka, kuimarisha mifumo ya nyumba kumi kimu na kufatilia mienendo ya wakazi kwenye mitaa yao.

Kwa upande wa wajumbe wa kamati hizo wamemuhakikishia Mkuu wa wilaya hiyo kufanyia kazi maelekezo yote aliyoyatoa ili kuimarisha ulinzi na usalama kwa wananchi.